Nace PROMIO, rede de cinemas independentes

PROMIO, nova rede de cinemas independentes, preséntase mañá no seo do Festival de Cine Europeo de Sevilla, con Ramiro Ledoxerente de DUPLEX Cinema, na presidencia.

A asociación "PROMIO, red de cines independientes", preséntase mañá no seo do Festival de Cine Europeo de Sevilla. Con Ramiro Ledo, xerente de DUPLEX Cinema de Ferrol, na presidencia, e con Javier Pachón (Cineciutat, Mallorca) na vicepresidencia, a asociación conta tamén coa participación de, entre outros, NUMAX (Santiago), CINE ESTUDIO CBA (Madrid), CINEMES GIRONA (Barcelona), ZUMZEIG (Barcelona), CINEMA TRUFFAUT (Girona), CINES EMBAJADORES (Madrid), CINEMA EDISON (Granollers), RAMBLA DE L'ART (Cambrils), CINEBAIX (Sant Feliu de Llobregat) ou CODEX CINEMA (Lugo).

Esta nova asociación está creada por un grupo de exhibidores coa vontade de acoller e representar a todos aqueles cinemas en España que defenden a diversidade cultural na exhibición cinematográfica

Esta diversidade reflíctese na cota de pantalla dedicada a filmes españois, europeos e de terceiros países infrarrepresentados no cómputo da cota de pantalla anual, cuxa presenza é maioritaria nas pantallas dos asociados.

O obxectivo principal é defender esta diversificación cinematográfica, así como axudar a mellorar o sector, fomentar a versión orixinal e subtitulada; potenciar a alfabetización audiovisual; impulsar medidas de estímulo económico; defender a experiencia cinematográfica en sala á vez que fortalecer a relación cos demais sectores da creación e a industria; promover a innovación nos modelos de negocio, a tecnoloxía e contidos e a defensa da sustentabilidade medioambiental aplicada ás salas de cinema.

O acto de mañá ás 10 da mañá poderá seguirse en directo a través da canle de Youtube do Festival de Cine Europeo de Sevilla e contará coas intervencións de José Luis Cienfuegos (director do Festival de Cine Europeo de Sevilla), Beatriz Navas (directora do ICAA), Ramiro Ledo (presidente de PROMIO) e Javier Pachón (vicepresidente de PROMIO). 

Ademais, está prevista a participación de Lucía Recalde (Xefa da Unidade Europa Creativa MEDIA – DG Connect da Comisión Europea), así coma dos representantes europeos de asociacións homólogas, como François Aymé (AFCAE - Francia), Christian Brauer (CICAE - internacional - e AGKINO - Alemaña), Domenico Dinoia (FICE - Italia), Fatima Djoumer e Claude-Eric Poiroux (Europa Cinemas).