Álex, cineasta novel, rompe a cuarta parede para nos contar que desexa facer un filme sobre os seus pais. Eles coñecéronse en 1989 na discoteca Paraíso. Namoraron e ela foi o froito desa unión. Sete anos logo da súa separación, ese lugar onde se atoparon é agora un supermercado Eroski. Esta é a trama, contada desde a comedia, de Eroski Paraíso, popular obra teatral de Chévere que salta agora á gran pantalla. A compañía, coñecida por unha posta en escena anovadora na que utilizan moitos audiovisuais, non o tiña moi difícil para trasladar a súa historia a imaxes en movemento.

O dramaturgo Xesús Ron fíxose acompañar do experimentado realizador Jorge Coira para esta adaptación, que conta co mesmo reparto que sobre as táboas. A filla é Cris Iglesias, un dos nomes que está a irromper máis forte entre as actrices galegas, e que xa nos acompañou recentemente na presentación de 16 de decembro, de Álvaro Gago, da que é protagonista. Os pais son os sempre fiábeis Miguel de Lira e Patricia de Lorenzo. Esta última visitará xunto a Ron DUPLEX Cinema o sábado 14 de decembro ás 19:55, para presentar e discutir co público a fita.

A inspiración vénlle a Ron dunha sala de festas que existiu realmente en Muros e que hoxe é, en efecto, un supermercado. Tirando de testemuños reais, tanto a obra de teatro coma o filme exploran a memoria colectiva dun lugar que tornou de punto de socialización a centro de consumo. Na liña política de Chévere, Eroski Paraíso non renuncia, a través do humor, á crítica social, realizando un retrato da transformación dos nosos hábitos nos últimos 35 anos. Como ben explica o dramaturgo, a xeración dos pais de Álex tívoo todo ao seu alcance e decidiu pasar pola vida coma quen percorre ansioso un corredor do supermercado. O debate fica aberto en DUPLEX Cinema.