Á sombra de monumentais refinerías que emerxen coma templos cromados, 'Un cielo tan turbio' viaxa por diversas paisaxes fronteirizas de Venezuela, o primeiro petro-estado, hoxe golpeado pola peor crise política e humanitaria que Sudamérica viviu no século XXI. Baixo ceos que auguran tormenta, somnolentos militares axexan no medio do mar Caribe, migrantes vagan por lúgubres vilas fronteirizas entre Venezuela e Brasil, e contrabandistas apuran os últimos barrís de gasolina cruzando clandestinamente polas trochas do hostil Deserto Guajiro. Todo isto ao son das esquizofrénicas novas do conflito político que emite unha radio desde a afastada capitalina. Este é un filme que retrata peregrinos e piratas, fillos orfos dunha terra que fixeron súa sen necesidade de plantar bandeiras, ou impoñer himnos; anárquicos coma a tormenta que ameaza poñer fin a este limbo onde se atopan suspendidos.

Sesión especial. Coloquio co seu director Álvaro F. Pulpeiro.