Cunha posta en escena enérxica e corporal, e unha visión implacábel sobre a violencia estatal israelí, Lapid (A profesora de parvulario) levou sobrado o Oso de Ouro na Berlinale. E é que esta historia (autobiográfica) de morte e resurrección non dá puntada sen fío. Nada máis chegar a París, Yoav fica literalmente espido, sen posesións nin identidade. Renace así de cero, renegando de Israel e do hebreo, e establece unha intricada e sensual relación cos seus protectores Émile (Quentin Dolmaire, A Violent Desire for Joy) e a súa moza Caroline (Louise Chevillotte, Amante por un día). Premio á Mellor Dirección no Festival de Sevilla 2019 «pola súa enerxía, a súa procura de novas posibilidades na linguaxe cinematográfica e un cruzamento moi orixinal entre identidade lingüística e persoal».