O capitán de barco Jakob Störr (Gijs Naber) aposta cun amigo nunha cafetería que casará coa primeira muller que entre pola porta… e faino coa misteriosa e sensual Lizzy (Léa Seydoux). A atracción é mutua e instantánea e, contra todo prognóstico, “consegue” o seu obxectivo. O introvertido capitán non sospeita que beberá os ventos por esta ‘femme fatale’… mais recollerá tempestades. As medias verdades e cambios de ánimo de Lizzy farán que Jakob se pregunte se a súa esposa lle é infiel co bohemio Dedin (Louis Garrel), desatando un maremoto de emocións, obsesións e desenganos. Unha brillante e paixonal historia de amor sobre os estragos dos celos e a soidade dentro da parella.

O filme inspírase na novela de Milán Füst «A historia da miña muller». Milán Füst é un autor húngaro que na liña de Kafka ou Proust describiron o desconcerto do home moderno ante un mundo en construción.